Datganiad I'r Wasg

Mae’r digwyddiad yn dechrau gyda Chyngerdd y Cofio yn Theatr y Dywysoges Frenhinol Port Talbot nos Wener 27 Hydref. Dan arweiniad Mal Pope, bydd y noson yn cynnwys perfformiadau gan y seren ganu o Gymru Sophie Evans, Côr Meibion Castell-nedd, Band Pibau Dinas Abertawe a Cerdd NPT Music. Daw’r cyngerdd i ben gyda Gwasanaeth Coffa, tawelwch a miloedd o betalau pabi coch yn disgyn.

Ddydd Sadwrn 28 Hydref, Canolfan Siopa Aberafan ym Mhort Talbot fydd lleoliad lansiad apêl pabi coch Lleng Brenhinol Prydeinig Port Talbot, cysegru’r Ardd Gofio, a diwrnod gwybodaeth. Daw’r dydd i ben gyda seremoni codi baner, ynghyd â stondinau gwybodaeth, ac Arddangosfa Oriel yr Arwyr Chwerwfelys – gan adrodd stori’r bobl o ardal Castell-nedd Port Talbot a gymerodd ran, ar faes y gad ac ar y ffrynt gartref, yn rhyfel 1914-19, a ddaeth i’w adnabod fel ‘Y Rhyfel Mawr’.

Bydd cerbydau milwrol yn y ganolfan siopa drwy gydol y dydd hefyd – lori Bedford Brydeinig o 1941 a Jeep milwrol.

Uchafbwynt arall fydd arddangos y ceisiadau ar gyfer Cystadleuaeth Celf Bod yn Blentyn Milwrol. Cynhaliwyd y gystadleuaeth, oedd yn agored i blant o deuluoedd milwrol yng Nghastell-nedd Port Talbot, ar y cyd â gŵyl eleni, a gofynnwyd i blant a phobl ifanc ddehongli ‘Bod yn Blentyn Milwrol’ mewn celf – boed hwnnw’n llun, yn gerdd neu’n stori fer. Cyflwynir gwobrau i enillwyr y gystadleuaeth yn ystod y dydd gan Faer Castell-nedd Port Talbot ac Arglwydd Raglaw Gorllewin Morgannwg.

Meddai Maer Castell-nedd Port Talbot, y Cynghorydd Chris Williams:

“Cynlluniwyd yr ŵyl flynyddol hon i dalu teyrnged i’r Lluoedd Arfog a’u teuluoedd yng Nghastell-nedd Port Talbot, y rhai a gwympodd, a’r cyn-filwyr o ddwy ryfel byd a rhyfeloedd eraill ledled y byd. Mae hefyd yn anrhydeddu’r rhai sydd wrthi’n gwasanaethu ar hyn o bryd, a’u teuluoedd, am y cyfraniad parhaus a wnânt gartref a thramor.

“Rydyn ni wrth ein bodd unwaith eto i gefnogi lansio apêl pabi coch Lleng Brenhinol Prydeinig Port Talbot.

“Mae hi hefyd yn dda gwybod fod cynifer o unigolion a sefydliadau’n cymryd rhan yn nigwyddiad eleni. Gobeithio y daw llawer o bobl draw i’r digwyddiadau i gefnogi ein Cymuned Lluoedd Arfog a’r apêl babi coch.”

Yn ogystal â’r cyngerdd a’r diwrnod gwybodaeth, bydd Llyfrgelloedd Castell-nedd Port Talbot yn cynnal cyfres o ddigwyddiadau ar thema’r cofio dros yr wythnosau nesaf, gan gynnwys sesiynau crefft, arddangosfeydd a sgyrsiau.

Bydd digwyddiadau’r ŵyl yn ychwanegol at orymdeithiau a digwyddiadau cymunedol sy’n cael eu cynnal gan gyn-filwyr, eu teuluoedd a chefnogwyr mewn cymunedau ledled Castell-nedd Port Talbot yn y cyfnod sy’n arwain at Sul y Cofio.

I gael mwy o wybodaeth a rhestr o beth sy’n digwydd, ewch i www.npt.gov.uk/GLA

- Diwedd -