Datganiad I'r Wasg

I wylio dros 100 o feicwyr gorau'r byd yn cychwyn o Fargam am y llinell derfyn yng nghysgod Castell Caerffili, prynwch docyn parcio a dewiswch slot amser ar gyfer cyrraedd y parc gwledig.

Dolen ar gyfer prynu tocynnau parcio: https://bit.ly/45aKpmm

Ar ôl i'r timau gael eu cyflwyno o'r podiwm cychwyn o flaen adeilad hanesyddol Castell Margam cyn diweddglo hirddisgwyliedig y ras (cymal 8), bydd y Cynghorydd Cen Phillips, sef Aelod Cabinet Cyngor Castell-nedd Port Talbot dros Natur, Twristiaeth a Llesiant, yn gostwng y faner gychwyn.

Bydd y beicwyr yn brwydro dros goron pencampwr Tour of Britain hyd y diwedd ddydd Sul, diolch i gwrs godidog ond heriol a gefnogir gan Lywodraeth Cymru.

Cefnogir dechrau swyddogol Cymal 8 Tour of Britain 2023 gan Gyngor CNPT a Grŵp Colegau NPTC ‘Mwy Nag Addysg Yn Unig’.

Dywedodd Mark Dacey, Prif Swyddog Gweithredol Grŵp Colegau NPTC: “Mae'n bleser gennym gefnogi'r digwyddiad beicio blaenllaw hwn wrth iddo ymweld â'n cymuned leol yng Nghastell-nedd Port Talbot. Mae'n rhoi cyfle i'n myfyrwyr a'n cymunedau weld rhai o enwau mwyaf y gamp yn dangos eu doniau ar ein ffyrdd gan roi cyfle hefyd i bobl gael hwyl yn rhoi cynnig ar feicio ac yn cymryd rhan mewn llawer o weithgareddau cyffrous ar y diwrnod.”

Hefyd, bydd cynrychiolwyr Day's Motor Group, sef cartref yr INEOS Grenadier 4x4 yng Nghymru, yn bresennol yn y digwyddiad i gefnogi tîm beicio INEOS Grenadiers ac i arddangos modelau diweddaraf yr INEOS Grenadier o ystafell arddangos y cwmni yng Nghastell-nedd.

Gall ymwelwyr â dechrau cymal olaf y ras hefyd wylio'r cymal i gyd yr holl ffordd i Gaerffili ar raglen ITV4 a fydd yn cael ei ffrydio'n fyw ar sgrin fawr o flaen y castell – dim ond un rhan o'r amrywiaeth o weithgareddau cyffrous yn y parc ddydd Sul, o saethyddiaeth i rasys beicio mynydd ‘Dirt Crit’ i bobl iau.

Mae disgwyl i fysiau timau Tour of Britain gyrraedd am 9.30am, cyn i'r ras ddechrau am 11.15am.

Gweithgareddau ychwanegol:

Sbortif Beicio Gwasanaeth Gweithgarwch Corfforol a Chwaraeon (PASS) CNPT a fydd yn cynnwys:

• ‘Dirt Crit’ – ras beicio mynydd i bobl iau ac oedolion (bydd angen trefnu lle ymlaen llaw – cliciwch yma)

• Sesiynau rhoi cynnig ar feiciau cydbwyso

• Ardal sgiliau – cwrs beicio byr am ddim a sgorfwrdd treigl

• Sesiynau rhoi cynnig ar e-feiciau

• Taith feicio i deuluoedd o amgylch y llyn

Bydd aelodau o dîm rygbi'r Gweilch hefyd yn bresennol a bydd croeso i chi ymuno yn eu gweithgareddau.

Gweithgareddau eraill ddydd Sul:

• Rhoi cynnig ar saethyddiaeth gyda Saethwyr Margam
• Go Ape – anturiaethau rhaffau uchel ar agor o 12.30pm
• Antur Parc Margam – ar agor o 12.30pm
• Llogi beiciau mynydd a gwibgerti a gweithgareddau dŵr fel pedalos, canŵio, caiacio a phadlfyrddio sefyll
• Cwrdd â Dr Bike
• Cwrdd â thîm Hamdden Celtic – rhoddion am ddim, gemau a mwy
• Cyfle i fwynhau cyfleusterau’r parc yn ystod eich ymweliad!

Bydd uned RevoLOOtion ar y safle drwy gydol y digwyddiad, yn cynnig cyfleusterau toiled cwbl hygyrch.