Rheolau Cyfryngau Cymdeithasol

Mae ein sianeli cyfryngau cymdeithasol yn cynnwys amrywiaeth o wybodaeth o'n gwasanaethau a'n partneriaid, sy'n rhoi'r wybodaeth ddiweddaraf i chi am yr hyn sy'n digwydd yng Nghastell-nedd Port Talbot.

Rydym yma i'ch helpu mewn unrhyw ffordd y gallwn, ond rydym yn disgwyl i ddefnyddwyr gynnig yr un lefel o gwrteisi i ni â'r hyn rydym yn ei gynnig iddyn nhw. Rydym am i'n sianeli cyfryngau cymdeithasol fod yn fannau diogel ac yn lle i gynnal trafodaethau iach, agored a chraff, ac felly mae gennym gyfres fer o reolau:

• Mae'n rhaid i bob defnyddiwr gydymffurfio â thelerau defnydd y llwyfan cyfryngau cymdeithasol yn ogystal â thelerau defnydd ein hun sydd wedi'u nodi yma.
• Chi sy'n gwbl gyfrifol am unrhyw gynnwys rydych yn ei bostio gan gynnwys cynnwys rydych yn dewis ei rannu.
• Byddwn yn cael gwared ar negeseuon a/neu ddiffodd sylwadau (lle caniateir hynny) a/neu rwystro defnyddwyr ar ein sianeli cyfryngau cymdeithasol sy'n rhannu negeseuon yr ystyrir yn rhesymol eu bod yn bodloni'r disgrifiadau isod:
  • Ddifrïol neu'n anweddus
  • Twyllodrus neu'n gamarweiniol
  • Difenwol (enllibus neu athrodus)
  • Anaddas, neu'n wahaniaethol yn erbyn unrhyw unigolyn neu grŵp
  • Torri unrhyw hawliau eiddo deallusol, gan gynnwys hawlfraint
  • Torri unrhyw ddeddf neu reoliad
  • Sbam a chynnwys sy'n newid y pwnc (negeseuon negyddol a/neu ddifrïol parhaus sydd â'r bwriad o beri ymateb)
    o Deunydd hyrwyddol, gan gynnwys dolenni i wefannau a hyrwyddiadau allanol

Byddwn yn hysbysu'r llwyfan cyfryngau cymdeithasol cysylltiedig am unrhyw un sy'n ymgysylltu â ni tro ar ôl tro gan ddefnyddio cynnwys neu iaith sy'n cael eu cwmpasu yn y categorïau uchod. Ni fyddwn yn goddef negeseuon difrïol neu'n ymateb iddynt.

Mae'n rhaid i ni aros yn wleidyddol niwtral bob amser ar y cyfryngau cymdeithasol, sy'n golygu nad yw swyddogion y cyngor yn gallu ymateb, cefnogi neu ymgysylltu ag unrhyw gynnwys sydd â chynnwys gwleidyddol (e.e. barn a nodau gwleidyddol unrhyw barti gwleidyddol a/neu unrhyw berson neu sefydliadau sy'n hyrwyddo unrhyw farn neu nodau gwleidyddol).

Os hoffech drafod materion gwleidyddol, cysylltwch â'ch cynghorydd lleol, ceir manylion yma.

Rydym yn monitro'n cyfrifon 8.30am - 5pm, ddydd Llun i ddydd Iau, 8.30am - 4.30pm, ddydd Gwener (nid yw hyn yn cynnwys gwyliau cyhoeddus).

Byddwn yn ceisio ateb eich cwestiynau, ond gan ein bod ni'n derbyn gymaint o negeseuon, efallai na fyddwn yn gallu ymateb i bob ymholiad.
Byddwn yn ailgyfeirio cwestiynau na allwn eu hateb drwy'r cyfryngau cymdeithasol lle bo'n briodol.

Rydym yn gwneud ein gorau glas i roi'r wybodaeth gywir i chi. Os byddwn yn gwneud camgymeriad, byddwn yn ceisio cywiro'r sefyllfa a darparu'r wybodaeth gywir yn gyflym.

Rhowch wybod i ni os ydych chi'n meddwl ein bod ni wedi gwneud camgymeriad, neu os ydych chi'n gweld unrhyw beth rydych chi'n ystyried ei fod yn anaddas neu sy'n peri pryder i chi.

Mae gennym yr hawl i ddileu ein cyfrifon a diweddaru neu newid y rheolau hyn ar unrhyw adeg.