Datganiad I'r Wasg

Ariennir yr £1.7m VVPF yn rhannol gan Gronfa Ffyniant Gyffredin (SPF) Llywodraeth y DU ac mae’n rhan o wariant £27.3m o gyllid SPF a glustnodwyd ar gyfer Castell-nedd Port Talbot o dros y tair blynedd nesaf.

Nod y VVPF yw mynd i’r afael â’r dirywiad mewn cymunedau gwledig ledled Castell-nedd Port Talbot, yn enwedig y lleihad mewn galw am siopau stryd fawr a chynnydd mewn galw am dai, prosiectau hamdden a chynlluniau teithio llesol.

Ymysg yr ardaloedd a dargedir mae Cwm Nedd, Dyffryn Afan, Cwm Tawe, Blaenau Cwm Aman a Chwm Dulais.

Bwriad y VVPF yw cael effaith gadarnhaol ar faterion allweddol i’r fwrdeistref sirol, gan gynnwys creu swyddi, iechyd a llesiant, balchder mewn lle a thwf economaidd.

Dyddiad cau mynegi diddordeb yw 31 Rhagfyr 2023, a rhaid o bob prosiect gael ei gwblhau erbyn 31 Rhagfyr 2024. Gall ymgeiswyr wneud cais am hyd at 70% o gyfanswm cymwys eu costau prosiect, hyd at uchafswm o £250,000.

Gallai cynigion am brosiectau gynnwys:  

• Grantiau eiddo masnachol
• Unedau preswyl (troi o ddefnydd masnachol i breswyl)
• Prosiectau isadeiledd gwyrdd a bioamrywiaeth
• Prosiectau i wella’r parth cyhoeddus
• Caffael strategol
• Cynlluniau marchnadoedd canol trefi a blaenau siopau
• Trefi digidol
• Teithio llesol
• Cyfleusterau hamdden a chwaraeon  

Gall darpar ymgeiswyr ddod o hyd i fwy o wybodaeth, gan gynnwys Canllawiau i Ymgeiswyr VVPF a Ffurflen Mynegi Diddordeb ar y dudalen we hon – UK Shared Prosperity Fund: Open Call for Applications to the Valleys and Villages Prosperity Fund (VVPF) – Neath Port Talbot Council (npt.gov.uk)

I gael sgwrs anffurfiol am unrhyw gynnig prosiect, e-bostiwch regeneration@npt.gov.uk neu ffoniwch 01639 686073.

Sefydlwyd y VVPF fel rhan o Gronfa Ffyniant Gyffredin y DU i dargedu ardaloedd yng Nghastell-nedd Port Talbot nad ydyn nhw’n dod o dan gategorïau cyllido eraill, fel menter Trawsnewid Trefi Llywodraeth Cymru, dyweder.

Meddai’r Cynghorydd

Jeremy Hurley, Aelod Cabinet Cyngor Castell-nedd Port Talbot ar Newid Hinsawdd a Thwf Economaidd: “Bydd y VVPF yn pontio’r bwlch cyllido ar draws y fwrdeistref sirol, fel nad yw pobl yn colli’r cyfle i gael cyllid.

“Bydd yn gwneud cyfraniad mawr er mwyn gwella cymoedd a phentrefi Castell-nedd Port Talbot, gan eu gwneud yn llefydd gwell i fyw a gweithio ynddyn nhw. Bydd hefyd yn ateb y galw am unedau masnachol a phreswyl mewn ardaloedd pan fo galw amdanynt.

“Bydd y VVPF yn cefnogi darparu Nodau Llesiant y cyngor yn uniongyrchol hefyd, yn ogystal â Deddf Llesiant Cenedlaethau’r Dyfodol. Dan nawdd y cynllun hwn, bydd cymunedau ein cymoedd yn elwa o welliannau a wneir i’w pentrefi, a fydd yn helpu gyda chreu swyddi lleol newydd, a gwell canfyddiad am le.”

Bydd darpar ymgeiswyr a fyddai’n gymwys i wneud cais am arian grant ar gyfer eu cynigion prosiect yn cynnwys perchnogion eiddo masnachol gwag, tirfeddianwyr, cynghorau tref a chymuned, awdurdodau lleol, parthau gwella busnesau a busnesau cymdeithasol.