Datganiad I'r Wasg

Prynhawn da unwaith eto,

Dwi’n meddwl taw’r pwynt pwysig cyntaf y dylwn i ei wneud yw mai bach iawn o wybodaeth sydd wedi cael ei rannu gyda’r Cyngor am y fargen fuddsoddi a wnaed rhwng Tata a Llywodraeth y Deyrnas Unedig.

A fyddech chi’n fodlon cymryd yr hyn dwi am ei ddweud y prynhawn yma gan gadw hynny mewn cof.

Mae dur o bwysigrwydd enfawr i Bort Talbot. Mae hefyd yn arwyddocaol iawn ar gyfer yr economi ehangach a diogelwch cenedlaethol. Dwi’n siŵr fod pawb yn yr ystafell yn deall hynny.

Mae’r Cyngor o’r farn fod yn rhaid i ddur barhau i chwarae rhan ganolog mewn datblygu ein heconomi i’r dyfodol.

Rydyn ni wedi bod yn gweithio gyda Tata a phartneriaid eraill ers blynyddoedd lawer bellach, drwy gyfrwng y Fargen Ddinesig a Chlwstwr Diwydiannol De Cymru. Rydyn ni wedi cydweithio ar waith arloesol newydd gyda’r nod o sicrhau dyfodol gwneud dur a’i holl ddiwydiannau cysylltiedig yma ym Mhort Talbot.

Ein cred ni yw bod cyfleoedd newydd a phwysig yn genedlaethol yn y farchnad o’n blaenau, fel y diwydiant ynni gwynt arnofiol.

Mae meddwl y gallen ni weithgynhyrchu dur gwyrdd fan yn, ar y safle hwn, all gael ei droi’n dyrbinau a fydd yn cynhyrchu ynni gwyrdd ar raddfa fawr yn y Môr Celtaidd a mannau eraill yn rhywbeth sy’n ein cyffroi ni’n fawr.

Edrychwn ymlaen at weld sut fydd y buddsoddiad hwn nid yn unig yn sicrhau cyfleoedd presennol yn y farchnad. Ein gobaith ni yw gweld marchnadoedd newydd yn cael eu hagor, all ddod â swyddi cynaliadwy, sy’n talu’n dda, yn eu sgil, yma i Bort Talbot ac i’r gadwyn gyflenwi ehangach.

Am y rhesymau hyn oll, dwi’n croesawu’r newyddion y bydd buddsoddi’n digwydd er mwyn pontio gwneud dur o’r technolegau presennol i rywbeth gwyrddach, amgen.

Ond yr hyn sydd hefyd yn glir yw y bydd effaith ar swyddi, busnesau, a’n cymuned ehangach yn ystod y cyfnod pontio hwn.

Ar adeg pan fo llawer o bobl ar draws ein cymunedau’n profi caledi, rhaid i bawb ohonom weithio gyda’n gilydd i leihau’r effeithiau hynny.

Rhaid i ni hefyd ymrwymo i gynllun hirdymor a fydd yn gosod sail gryfach a mwy cynaliadwy i’n heconomi.

Gallaf eich sicrhau y bydd y Cyngor yn chwarae rhan lawn a hyfyw wrth helpu i beri i hyn ddigwydd.

Ond bydd yn golygu fod pawb ohonom ni yn yr ystafell hon yn cydweithio i gyflawni cyfnod pontio cyfiawn – yn ogystal â’n partneriaid ehangach a’r gymuned ei hun.

Dyna gloi fy sylwadau am y prynhawn, Gadeirydd, am fy mod i’n cydnabod taw dim ond dechrau sgwrs yw hyn heddiw.